#الاطاري بس مدلع

 إنه الإطاري بس دلعوه! 😉🇸🇩

#الحكاية ميتة ومنتهية واللعبة بقت على المكشوف. زمان لما الفريق شمس الدين الكباشي مشى المنامة الإعلام الكيزاني أقام الدنيا وما قعدها وسرّب الخبر عشان يفركش أي تقارب. 

#الليلة نفس الإعلام دا وبنفس الوجوه قاعد يسرّب تفاصيل لقاء الكباشي مع مستشار الرئيس الأمريكي مسعد بولس في القاهرة

بس المرة دي بـ لغة ناعمة وطرح إيجابي ذي الهدنة الناعمة 😸

سبحان مغير الأحوال.. من منذرين إلى مبشّرين!

#الحقيقة الواضحة العايزين يغطوها بـ الدلع الجديد هي إن المؤسسة العسكرية وافقت رسميًا على خارطة الحل الدولي بتاعت جدة والمنامة وجنيف والبنود دي بالحتة هي نفس الإطاري الكانوا بيشيطنوه:

 * هدنة إنسانية طويلة لمدة 90 يومًا.

 * آلية أممية–أفريقية–عربية للإشراف على الانسحابات ومراقبة الهدنة.

 * ترتيبات أمنية صارمة: نزع السلاح، التسريح، وإعادة الإدماج (DDR).

 * تجميع القوات في معسكرات محددة تحت عين المراقبين الدوليين.

 * الوصول لجيش موحد يخضع تمامًا لحكومة مدنية منتخبة وإبعاد الجماعات المتطرفة.

🛑 كذبة الانسحاب الكامل وحفظ ماء الوجه

#القصص البتتكتب في الميديا عن شرط انسحاب الدعم السريع كليًا وتسليم مواقعه للجيش دي مجرد مكياج سياسي لحفظ ماء الوجه قدام القواعد. 

#المصادر الرفيعة أكدت إنو بند الانسحاب الأحادي دا ما اتطرح أصلاً في قعدة بولس والكباشي وأمريكا نزلت ورقة الحل والجيش وافق عليها بلا شروط.

بالمنطق العسكري والسياسي: في أي اتفاق بوجود طرف ثالث أو آلية مراقبة الانسحاب بكون متبادل عشان المنطقة تكون محايدة. 

#الدعم السريع المسيطر ميدانيًا ما حايتفاوض بشروط استسلام التفاوض ماشي بالتراضي والواقعية.

🤔 لـيـه الكباشي.. ومـنـو الـوراء الـطـربـيـزة؟

#السؤال الكبير: 

ليه الكباشي بالذات في المنامة والقاهرة ومش البرهان؟

 * المواصفات الدولية: #الكباشي هو الشخصية العسكرية المهنية الـبتنطبق عليه شروط المجتمع الدولي لتنفيذ بند الـ (DDR) وإعادة هيكلة الجيوش بعكس البرهان وياسر العطا.

 * الدور المصري: واضحة إنو القاهرة قدمت الكباشي كبديل مضمون الكلمة لربط المسار العسكري مع أمريكا بعد ما سئمت من مناورات البرهان.

 * التحول الإقليمي: 

استضافة مصر للقاء دا يعني تحول كامل من الرفض العنيف للتدخل الدولي إلى القبول التام بمخرجات لقاء (بن زايد - السيسي) والاجتماع الرباعي.

المعادلة اتغيرت والأسئلة التائهة بتاعت امبارح بقت إجابات واضحة الليلة. 

#القصة قصة وقت والبلد ماشة لتهدئة فرضها المجتمع الدولي والإقليمي.. والاتفاق القادم هو الإطاري زاتو بعينه

بشحمه ولحمه بس غيروا اللوحة برة.

هنا يبرز السؤال الكبير 

لماذا إشعلتم الحرب يا كيزان

#السودان #الوضع_السياسي #الكباشي #أوقفوا_الحرب